Taxi chungchanga buaina tireh turin Meghalaya BJP hruaituin Assam CM a ngen

Assam leh Meghalaya inkara tourist taxi tlan ṭhinten buaina an neih mek tih reh a nih theihna turin, Meghalaya BJP hruaitu Sanbor Shulai chuan Assam chief minister Himanta Biswa Sarma chu in rawlh a, harsatna awmte chinfel dan ngaihtuahpui turin a ngen.

Shulai chuan heng buaina thleng mek avang hian state pahnih mipuite bakah khualzinte pawhin harsatna tam an tawk a ni tiin, state pahniha transport association-te chu inremna kawng zawnga an inbiak thuai a ṭul thu a sawi.

All Khasi Meghalaya Tourist Taxi Association (AKMTTA) chuan an state-a khualzin kalte phurh chungchangah, Assam leh state danga tourist motor te lakah khuahkhirhna siam turin Meghalaya sorkar an ngen a, an thil phut tihhlawhtling tur hian ni sarih hun an pe bawk.

AKMTTA thil phut avang hian All Assam United Motor Transport Association (AAUMTA) chuan Meghalaya-a nitin mamawh an phurh luh ṭhin titawpah an vau let ve nghal a, hei vang hian state pahnih inkarah hian buaina hi a awm zui ta a ni.

Shulai chuan AAUMTA thuchhuah hi sawiselin, hmarchhak biala in unauna tichhe thei a ni tiin, Sikkim leh Darjeeling te nen erawh an thawhhona a ṭhat thu a sawi lang a ni.

AKMTTA te thuchhuah pawh uluk zawka ngaihtuah a ṭul thu Shulai chuan sawiin, Assam tourist taxi association nen inhriatthiam tawnna leh thawhhona ṭha zawk neih a pawimawh thu a sawi bawk.