Nagaland : Central scheme for tribal-in thingtlang khua 608 huam dawn

Tribal-te dinhmun chawikanna tura sorkar laipui scheme, Pradhan Mantri Janjatiya Unnat Gram Abhiyan (PMJUGA) chuan Nagaland-a district thingtlang khaw 608 ah kalpui a ni dawn. He scheme hian tribal mite tana hman tur hamṭhatna chi hrang hrang a duang a ni.

Tribal affairs secretary Angelina Tanjen chuan chief secretary, J Alam-a'n Thawhṭanni chawhnua Nagaland civil secretariat conference hall-a virtual briefing a kohah he thu hi a sawi a ni. He meeting ah hian district hrang hrang-a DC te an tel.

He meeting hi virtual hmangin Alam chuan a kaihruai a, PMJUGA ṭangkaina a sawi bakah tribal tamna hmun Nagaland bik tan a pawimawhna te a sawi bawk. Alam chuan department hrang hrangte chu he scheme hi hmang ṭangkai tura a ngen bakah, department-te chu social media kaltlanga he scheme ṭangkaina puangzar tur hian a ti bawk.

Tanjen chuan power point presentation hmangin he project thil tum chi hrang hrang te chu a pho lang bawk a ni. He scheme hian state leh union territory 30-a district 549 leh block 2740-a tribal tamna khua 63,000 a huam dawn tih a sawi. PMJUGA hi union cabinet hnuaia Ministry of tribal affairs te scheme pawm thar niin thil tum hrang hrang an neih zingah hian khaw chhung tih changtlung te, mipui khawsak relbawl dan siam ṭhat leh zirna kawnga hmasawn te an tel a ni.