Cabinet atangin CM Mukul-a'n minister pathum paih a tum

Meghalaya-a Congress MLA pariatin Chief Minister Mukul Sangma laka an lung­awi loh thu an thlen hnuah Chief Minister chuan minister pathum- Deborah Marak, HDR Lyngdoh leh Rowell Lyngdoh te chu a cabinet aṭanga paih a duh thu party High Command-ah a thlen.

Chief Minister Mukul-a'n minister pathum paih a tumna hi Congress thawhpui, NCP MLA Sanbor Shullai leh Congress MLA pahnih- Martin Danggo leh Ronnie Lyngdoh te tana minister post hawnsakna atana a tih rin a ni.

NCP MLA leh Congress MLA pahnihte hi Assembly Speaker AT Mondal laka no-confidence motion putluh a nih laia hnehna an chan theih nan theihtawp chhuaha beitute an ni.

Meghalaya Congress party official chuan Chief Minister laka lungawi lo MLA te'n a kalphung nasa taka an dodal hnuah minister pathum paih tur chu Chief Minister-in MLA lungawi lote rilru na thawi dam nan hun eng emaw chen a hman theih a beisei thu a sawi.

Hetihlai hian Congress party High Command chuan minister paih tura Chief Minister rawtna a la pawmsak loh thu party official chuan a sawi a, Chief Minister Mukul-a'n cabinet minister paih tura party High Command a ngenna chu a hmain Congress President Sonia Gandhi-in a lo pawmsak lo a ni, a ti.

NCP MLA Shullai hi Speaker Mondal laka no-confidence motion putluh a nih hma, March 23 khan Deputy Speaker aṭangin a bang a, Speaker hi March 25-ah fiah a ni. No-confidence motion putluh huna House inkhawm kaihruai tur, Deputy Speaker Shullai hian Speaker fiahna a kaihhruai chuan eptute'n Speaker Mondal hi an paih­thla thei dawn nia a hriat avangin Chief Minister Mukul chuan bang turin a ngen nia sawi a ni a, hei hian Chief Minister Mukul-a din­hmun pawh a tiderthawng thei nia sawi a ni bawk.

Speaker fiahna hi Panel of Chairmen-a member Congress MLA Ronnie Lyngdoh chuan kaihruaiin, Speaker Mondal hian voice vote hmangin fiahna a paltlang a, hei vang hian Chief Minister Mukul chuan MLA Ronnie hi cabinet minister post pek a tiam niin an sawi.

Congress MLA lungawi lo zinga mi, Martin Danggo pawh hi Panel of Chairmen zinga mi a ni a, Speaker fiahnaah damloh chhuanlama tel lo tura thlem niin, Speaker-in fiahna a paltlang a nih chuan cabinet minister post pek tiam a ni bawk. Martin Danggo hi Deputy Speaker a ban bawk avangin Panel of Chairmen zingah House-a Speaker fiah­na kaihhruai tur langsar ber a ni a, mahse hemi ni hian damloh chhuanlamin a tel lo a, House-a Speaker fiahna inkhawm hi Panel of Chairmen zinga mi, Ronnie Lyngdoh-a'n a kaihruai ta a ni.

NCP MLA Shullai, leh Congress MLA Danggo leh Ronnie te hi Chief Minister-in cabinet post pek tiam mah se Congress party chhungah MLA te lungawi lohna nasa tak a thlen chhunzawm reng avangin thil awlsam tak a nih a rinawm loh. Cabinet aṭanga paih­thlak tur minister pathumte hian eptute nen ṭang­­rual­in sorkar an sawi­nghing ang tih Congress Legislature Party chuan a hlau a ni.

Hetihlai hian Chief Minister-in NCP MLA Shullai hnenah cabinet post a pe a nih chuan Congress MLA zingah lungawi lo an pun a rin thu party official chuan a sawi bawk.

Congress party kaihhruai MUA ṭangrual sorkarah hian Congress-in MLA 29 a nei a, NCP MLA pahnihin an thlawp bakah Independent MLA 11-in an thlawp bawk a ni.