Arunachal Pradesh-a khualzin hip lamah Sorkar chechhuak dawn

Arunachal Pradesh chuan ramchhung leh rampawn aṭanga khualzin tam zawk hip nan tourism infrastructure te tihchangtlun tumin hma a la mek a, hemi atan hian Union Tourism Minister Mahesh Sharma chuan project kalpui nan sorkar laipuiin fund tam zawk a tumsak tur thu a sawi.

Union Tourism Minister Sharma hian tun hnai khan Arunachal Pradesh a tlawh a, Minister of State for Home Affairs Kiren Rijiju leh Tourism Ministry-a senior official te'n an ṭawiawm.

Arunachal Pradesh tourism secretary Joram Beda chuan tourism sector tihchangtlun nan theihtawp chhuah an beih a ngaih thu a sawi.

"Punjab chu lui panga luan­na ram tia hriat a ni a, mahse mi tam tak chuan Arunachal chu Himalaya lui panga - Siang, Kameng, Subansiri, Lohit leh Tirap lui luanna a ni, tih an hre kher lo ang. Hei bakah hian wildlife park pakua kan nei bawk a, kan lui te hi rafting tih nana remchang tak tak an ni hlawm," tiin Beda chuan a sawi.

"Arunachal chuan adven­ture sport leh religious tourism tihchangtlun nan hmun remchang tam tak a nei a, hei hi theihtawp chhuahin tihpuitlin kan tum a ni," a ti.