Manipur-ah bird flu a leng

India ramah swine flu a len aṭanga thla khat hnuah Manipur-ah chuan bird flu, natna hri a leng tih finfiah a ni.

Veterinary and Animal Husbandry Department chuan Pathianni khan bird flu a len thu hi a puang a ni.

Imphal-a Indian Council of Agricultural Research (ICAR) poultry unit chuan an ar vulh zinga Avian Influenza (HPAI H5N1) vei an awm leh awm loh finfiah nan April 16 khan Madhya Pradesh khawpui, Bhopal-aNational Institute of High security Animal Diseases-ah sample an thawn a, natna an vei ngei a ni, tih finfiah a ni ta a ni.

ICAR, Imphal chuan confirmation result hi kar kalta Inrinni khan a dawng a ni.

Bird flu chhuahna hmun, Imphal-a ICAR hmunpui huam chhung aṭanga kilometre 10 bial chu , chu infected zone leh surveillance zone-a puan nghal a ni.

Hemi chungchangah Manipur Chief Secretary chuan thuchhuah a siam nghal a, infected zone chhunga ar vulh leh artui tharchhuahte chu guidelines anga suat vek tur a ti a, hemi atan hian state sorkar chuan sorkar laipuiin nen ṭangrualin zângna­dawmna a pe ang.

Surveillance zone chhung­a ar leh artui phur luh emaw hralh chhuah chu khap nghal a ni bawk.