Congress-in nationalism ngaihtuah nawn turin helpawlte a ngen

Nagaland Pradesh Congress Committee-a, Political Affairs Committee chairman KV Pusa chuan Naga nationalism chu pawl pakhat ta emaw helpawlte ta a nih loh thu sawiin, Naga helpawlte chu Naga nationalism chungchang ngaihtuah nawn turin a ngen.

Pathiannia thuchhuah a siamah Pusa chuan Naga nationalism hming chhalin pawl ṭhenkhatte chuan Naga political issue chu thil nuih­zatthlakah an siam mek a ti a, hei vang hian khawvel pumah Naga politicial issue chu thil nuihzatthlakah miin an ngai mek a ni, a ti.

"Naga mipuite aiawhtu nia inchhal pawl ṭhenkhat chauhin politics thila Naga buaina hi an chingfel dawn lo a, Naga politicial issue chu chinfelna chu Naga mipui zawng zawng mawhphurhna a ni," a ti.

Pusa chuan Naga mipuite hruaitu a nih angin Naga politicial issue kaihhnawihah India ram hruaitu pawimawh tak tak, Prime Minister te pawh a hmuh ṭhin tawh thu a tar­lang bawk a, hetianga inbiak­na hmanga harsatna chinfel hi Naga mipuite zawng zawng pawmtlan theih a ni, a ti.

"Naga political issue chin­fel nan helpawl leh pawl dang dinbelh zel a ṭul lo a, mipuite harsatna belhchhahtu nih hi a ṭha lo a ni," a ti.

SS Khaplang-a kaihhruai, National Socialist Council of Nagaland (NSCN-K) aṭanga chhuak, NSCN (Reformation) te'n tun hnaia a nihna an zawh chungchangah Pusa chuan Naga political issue chinfel a nih chuan ‘Naga Indian’ a nih tur thu a sawi.