ACC-in bicycle lane siam an phût

Agartala Cycle Club (ACC) chuan nimin khan Tripura sorkarah memorandum thehlutin, Agartala khawpui chhunga lirthei kawngpuiah thirsakawr tlanna atan lane hran siamsak turin an ngen.

ACC Secretary Dhiman Daschaudhuri chuan Agartala Municipal Corporation (AMC) huam chhunga secondary school zirlai hmei­chhiate tan state education department-in kum hnih kalta chhung khan thirsakawr 6000 a semchhuah thu a sawi a, hetihlai hian AMC huam chhungah himna lam ngaihtuah loa thirsakawr hmang ṭhin mi 1000 chuang an awm tih a sawi bawk.

"Thirsakawr sem a nih chhan chu lirthei te'n boruak an tibawlhhlawh nasa lutuk tur venna a ni a, mahse thirsakawr hmangte himna lam ngaihthah a ni avangin he thil tum hi a hlawhtling lo a ni," tiin Daschaudhuri chuan a sawi.

ACC chuan cycle rickshaw te chu lirthei tlan tam hunah kawngpui lûn laiah tlan phalsak lo turin state sorkar an ngen bawk a, lirthei hmanga veivahna a awlsam zawk nan kawngpui lun lo laiah tlantir turin an ngen a ni.

Agartala Cycle Club chuan traffic lama thuneitute chu kea kalte himna ngaihpawimawhsak turin an ngen bawk.