Meghalaya-in Gates Foundation MoU a ziahpui

Meghalaya sorkar chuan state healthcare leh agriculture sector tih hmasawnna turin Bill & Melinda Gates Foundation (BMGF) chu thawhpui turin inremna a ziahpui.

Memorandum of Understanding (Mou) hi nu nau nei te leh nau piang hlimte hriselna, family planning, nursing education leh ran vulh kawnga hma sawnna tura hma lakna turin ziah a ni a, inremna ziah lai hian chief minister Conrad K sangma leh health minister Dr. M Ampareen Lyngdoh te pawhin an telpui a ni.

Meghalaya hi hemi kawngah hian Uttar Pradesh leh Bihar hnuah India rama Gates Foundation thawhpui tur state pathumna a ni. MoU hi BMGF India Country Office-a director, M.Hari Menon leh Health & Family Welfare Department, Meghalaya-a principal secretary Sampath Kumar ten an ziak.

Kum li chhung thawhdunna tura inremna an siam hi United Nations Sustainable Development Goals (SDGs) zulzuia kalpuiin, healthcare lam a thlurbing dawn a ni. Gates Foundatoin hian sum lam bakah technical lamah a pui dawn a, nu naupawm laite hriselna, hri danna leh agriculture lam ngaih pawimawh a ni ang. Hmasawn dan pawh uluk taka thlithlai reng a ni dawn a, Meghalaya State Health Society chuan program hrang hrang kalpui dan hi a enpui ang.