Tripura : CM-in Rubber Park thar hawn a nih tur thu puang

Tripura chief minister Manik Saha chuan Agartala-a Tripura Rubber Conclave, 2024 neihah Santirbazar, South Tripura District-ah rubber park thar hawn a nih tur thu a puang.

He park thar hi state chhunga thil siam chhuah ṭhan len zel nan leh, India rama rubber hmanga thil siamchhuak tam state pahnihna ni lai mek annihna tih lenna tur a ni. India rama rubber hmanga thil siam chhuah zinga 9% chu Tripura aṭanga siam a ni. Park thar hi Bodhjungnagar-a an hmunhma neihsa laka huang an zauhna tur a ni bawk.

Conclave-ah hian Tripura-in rubber quality ṭha, industry hrang hrang a hman theih, a bikin rubber wood furniture siamna atana ṭha bik a neih chungchangte sawi ho a ni. An thil siamte ti lar tur hian Chief Minister Saha chuan lehkhabu te "Transforming Tripura: The land of Opportunities" tih chu a tlangzarh bawk a ni.

He hunah hian rubber industry neituten hun lo awm zel tura an hmalak dan tur te sawi hoin presentation an nei a, state sorkar chuan rubber, mau leh eitur siamna hmun atan hian industrial area an ruahman thu leh puih an ngaihna apiangah puih zel an inhuam thu a sawi bawk. Hun hmanpuite zingah hian Industry and commerce minister Santana Chakma leh chief secretary JK Sinha te pawh telin, ram economy ṭhanlen nana ramchhung thil awm sa hmanga thil siam chhuah kawnga sorkar inpeknate uar takin an sawi bawk.