Hmarchhak biala railway project atan vbc 5,338

Hmarchhak biala railway project hrang hrangte tihkhawtlai an nih avanga sawiselna nasa tak a hma­chhawn hnuah Railway Ministry chuan hmarchhak biala railway project atan cheng vaibelchhe 5,338 a ruahman thu a tarlang.

Union Minister of State for Railways Manoj Sinha chuan hmarchhak biala railway infrastructure tihchang­tlun chu Indian Railways-in a ngaihpawimawh thu a sawi a, project atana vaibelchhe 5,338 an dah chu sorkar laipuiin hmarchhak bial railway project atana sum a dah tam ber ṭum a ni, a ti.

Kum 2014-2015 chhung­in hmarchhak bial rel kawng zauh nan leh kawng thar siam nan vaibelchhe 5,200 dah a nih thu leh sen a nih thu a sawi bawk a, kum 2015-2016 chhungin a aia tam sum rua­hman leh a ni, a ti.

"Mipuite'n an hlawkpui dan tur te leh mamawh dan te, kawng awm sa thawm ṭhat ngai te, rel la luh lohnaa kawng sial ngaite leh project kal lai chak zawka kalpui ngaite ngaihtuah chungin railway project chu siam ṭhin a ni," tiin Sinha chuan a sawi.

Kum 2012-2013-ah hmarchhak biala rel kawng thar sial nan leh rel lian thlan theih tura a kawng tê a lian zawka thlak nan cheng vaibelchhe 2278 dah a ni a, kum 2013-2014-ah cheng vaibelchhe 3392 dah a ni tih Sinha chuan a sawi bawk.

Minister of State for Railways Sinha chuan kum kalta chhung khan Ministry of Railways-in hmarchhak bial­ah rel kawng lian kilometre 450-a thui a hawn thu a sawi.