Helpawlte vauna karah Catholic school te an hawng

Helpawlte vauna avanga Imphal-a Catholic school te chu April 7 aṭanga khar an nih hnuah Thawhṭanni khan hawn leh an ni.

Kangleipak Communist Party (KCP)-MC helpawl chuan private school te'n school fee an lak dan chungchanga rawtna an siamte Catholic school te'n an zawm theih loh avangin Catholic school zawng zawng an boycott a, hei vang hian Catholic school te hi khar an ni.

Helpawlte hian school te hi la boycott mah se zirlai pawl leh tlawmngai pawl hrang hrang te'n an ngenna avangin Thawhṭanni aṭang khan Imphal-a Catholic school te chu an hawng leh a ni.

Democratic Students’ Alliance of Manipur (DESAM) kaihhruaina hnuaiah school naupang nu leh pate chuan Pathianni khan meeting an nei a, school hawntir leh an rel a, Thawhṭanni khan school naupangte school kai tur hi an veng nghal.

DESAM hotute chuan school leh zirlaite himna chu an ngaihtuahsak tur thu school thuneitute an hrilh bawk.

DESAM bakah hian All Manipur Students’ Union (AMSU) leh Manipur Students’ Federation (MSF) school thuneitute chu zirlaite zirnain a tawrh loh nan school hawng turin an lo ngen tawh a, hemi rual hian helpawlte pawh Cathlolic school an boycott-na hlip turin an lo ngen tawh bawk.

Catholic school te hawn leh tur chungchangah state sorkarin hmalakna engmah a neih loh avangin school te hawn a nih avanga thil duhawm lo thleng a awm a nih chuan DESAM chuan an hmachhawn zel tur thu an tarlang.