Bird Flu vangin Manipur-ah ar suat ṭan

Bird flu (avian influenza) natna hri leng avangin Manipur-a Indian Council of Agriculture Research (ICAR) poultry unit ar vulhte chu Thawhṭanni aṭang khan an suat ṭan.

Manipur Chief Secretary PC Lawmkunga chuan Imphal, Lamphelpat-a Indian Council of Agriculture Research poultry unit ar vulh damlo te sample enfiahna aṭangin avian influenza natna an vei tih hmuhchhuah a ni, a ti.

ICAR poultry unit hian April 16 khan Madhya Pradesh, Bhopal-a National Institute of High Security Animal Diseases-ah sample an thawn a, kar kalta Inrinni khan result an dawng a, avian influenza natna an vei ngei tih finfiah a ni.

PC Lawmkunga chuan ICAR poultry unit aṭanga kilometre 10 bial chhung chu infected zone leh surveillance zone-a puan a nih thu sawiin, ar neitute chu sorkarin zângnadawmna a pek tur thu a sawi bawk.

Ar vulhte suat an nih bakah hian heng hmun aṭanga artui tharchhuah leh ar chaw lam chite chu tihchhiat a ni bawk ang.

State sorkar chuan surveillance zone-ah ar leh artui lakchhuah leh hralh a khap bawk.