Manipur cabinet siksawi Minister paruk bân, mi thar panga lalut

Manipur chief minister N Biren Singh chuan a cabinet siksawiin, minister ṭanglai mi paruk banin, mi thar panga a lalut. 

Minister atana lakluh thar pangate hi BJP MLA pathum, S Rajen, Vungzagin Valte, Th Satyabart leh tunhnaia Congress aṭanga bang a, BJP zawm ta pahnih O Lukhoi leh Okram Henry-te an ni. Thawhlehni tlai dar 5 khan minister tharte hi Imphal-a Raj Bhavan-a banquet hall-ah Governor Najma Hep­tullah chuan rinawmna thu tiam tirin a lalut a ni. 

Minister tharte lakluh an nih hnuah CM chuan a cabinet siksawi chu central lama an party hruaitute rawtna anga tih a nih thu a sawi. Cabinet siksawi a nih avanga minister aṭanga ban takte chu  V Hangkhalian (Agriculture and Animal Husbandry), Nemcha Kipgen (Social Welfare and Cooperation), Th Radheshyam (Education, Labour and Employ­ment),  L Jayantakumar (Health & Family welfare), K Shyam (Consumers Affairs Food & Public Distribution) leh N Kayisii( Tribal Affairs & Fisheries) te an ni. 

Manipur Legislative Assem­bly-ah hian seat 60 awmin, Chief Minister telin council of minister hi 12 an awm thei a ni. Minister paruk ban an nih hnuah panga lakluh an nih avangin CM hian minister dang pakhat a la ruat belh thei dawn a ni.