HNLC-in bandh huaihawt dawn

Hynniewtrep National Liberation Council (HNLC) helpawl chuan vawiina BJP president Amit Shah-a'n Meghalaya a tlawh tur denchhenin darkar 12 awh bandh a huaihawt dawn.

HNLC thupuangtu Sainkupar Nongtraw chuan India rama hnam leh sakhaw tlem zawk te'n Sangh Parivar te kuta nekchepna an tawh duh loh lantir nan bandh huaihawt an ni, a ti.

BJP president Shah hian tun hnai khan Mizoram, Nagaland leh Manipur a tlawh tawh a, vawiin hian Sikkim aṭangin Shillong a pan dawn a ni. Shillong-ah kohhran hruaitute leh tlawmngai pawl hrang hrang hruaitute a kawm bakah party worker te meeting a neihpui bawk ang.

HNLC thupuangtu Nongtraw chuan BJP chu Hindu rama India siam tum a, India danpui siamṭhat tumah a puh a, BJP, Rashtriya Swayamsevak Sangh (RSS) leh Vishva Hindu Parishad (VHP) te'n sakhaw inthliarna policy an kalpui zel a nih chuan BJP-in Khasi leh Jaintia hills-a party office an hawnte chu a khar ṭul thu leh BJP aiawha inthlan chuhte chuan HNLC an hmachhawn a ṭul tur thu a sawi.

Hetihlai hian BJP Meghalaya unit chuan an president lo lawm turin nasa takin a inbuatsaih thu state BJP general secretary Dipayan Chakraborty-a'n a sawi.

Meghalaya police te pawhin BJP president lo kal turah khauh taka venhimna kalpui an tum thu an tarlang bawk.

HNLC helpawlte hian Meghalaya-ah Khasi state hran siam an phût a, Bangladesh-ah inkulh mek a ni.

Sorkar laipui chuan November, 2014 khan HNLC te hi Unlawful Activities (Prevention) Act, 1967 tlawhchhanin, dan pawnah a hnawl a, dan pawna a dah hun a tawp dawn avangin Meghalaya sorkar chuan HNLC te hi dan pawna la dah chhunzawm zel turin tun hnai khan sorkar laipui a ngen a ni.