Sorkar hnathawkte hi mipui chhiahhlawh : Nagaland CM TR Zeliang

Nagaland Chief Minister T.R Zeliang chuan sorkar hnathawkte chu mipuite chunga lal an nih loh thu leh inpekna nena mipuite rawngbawl tur, mipui chhiahhlawh an nih thu a sawi.

Civil Services Day lawmna Thawhṭannia neihah Chief Minister Zeliang chuan he thu hi a sawi a, civil service te chu dinhmun sang chauh chan duh vanga an hna zawm an ni em tih ngaihtuah ṭhin tur leh an duhna hmuna post an nih loh hun pawha sorkar leh mipuite rawngbawltu an nihna hre reng turin a ngen.

Zeliang chuan Nagaland mipui nuai 20 chuang aṭangin Nagaland chu India rama sorkar hnathawk ratio sanna ber a ni, a ti a, mihring 15 zelah sorkar hnathawk pakhat an awm, a ti.

"Sorkar hnathawk tam mah se an hna thawh chak leh hlawk lamah chuan an tamna hian awm­ze thui tak a nei lem lo," a ti.

Nagaland Chief Minister chuan eirukna titawp tur leh hmasawnna thlen tura state sorkar inpekna sawiin, post awm loa sorkar hna lak te, hna thawk loa hlawh la te, a ruka pension la te chu tihtawp an nih tur thu a sawi bawk.

Civil Service te chu hna an thawhnaah huaisen taka an mawhphurhna hlenchhuak ngam turin a fuih.

Sorkar hnathawk an tam avanga kum tin non-plan sum a pun thu sawiin, Zeliang chuan sorkar laipuiin Normal Central Assistance (NCA) a pekte chu Benefit Cost Ratio (BCR) sang lutukin a eiral zel a ni, a ti.

Nagaland chuan state a nih aṭanga a kum 50-na kalpel tawh mah se state sum mamawh 90% chu sorkar laipui aṭanga a hmuh a ni, a ti a, civil service te chu thil kal dik lo lai ngaihtuah chhuak turin a ngen bawk.

Centrally Sponsored Schemes atana fund an hmuh tel loin an fund hmuh aṭanga 60% chu Nagaland mipui zawng zawng aṭanga 10% chauh, sorkar hnathawk leh pensioner te hlawh atana hman a ni tih Chief Minister Zeliang chuan a sawi bawk a, 18% chu sorkar leiba rulh nan leh 22% chauh chu hmasawnna atana hman a nih thu a sawi.

State sorkar inrelbawlna leh sorkar kalphung tihchang­tlun nan civil service te chu thawk ho turin a ngen bawk.