Union panel-in Etalin power project chungchang ngaihtuah dawn

Union Ministry of Environment, Forest and Climate Change (MoEFCC) hnuaia Expert Appraisal Committee (EAC) on River Valley and Hydroelectric Projects chuan April 23 leh 24-a meeting vawi 83-na a neih turah Arunachal Pradesh, Dibang Valley district-a 4000-MW Etalin Hydroelectric Project (HEP) din tura environment clearance chungchang a ngaihtuah nawn dawn.

Hetihlai hian Etalin Hydroelectric Project kalpui tur hi cumulative impact assessment (CIA) nei hmasa loa kalpui tum a ni a, hei vang hian lui mawng lama cheng, Arunachal Pradesh leh Assam mite'n an tawrh phah a hlauhthawnawm a ni.

Assam-a anti-dam activist leh tlawmngai pawl hrang hrangte chuan an ṭhenawm state-a hydro power project kalpui tur chungchangah a nghawng an tawrh theih avang­in anmahni rawn hmasak an lo phût tawh bakah power project kalpui tur reng rengah CIA neih hmasak an phût bawk.

EAC chuan April 23 meeting hian Upper Siang district-a 96-MW Sippi HEP, 96-MW Mago Chu HEP, 96-MW Nyukcharong Chu HEP leh Tawang district-a 96-MW New Melling HEP kalpui tura environment impact assessment (EIA) atana terms of reference (ToR) te pawh ennawn a tum bawk.

April 24-ah West Siang district-a 74-MW Tagurshit HEP leh 4000-MW Etalin HEP kalpui tura environment clearance chungchang a ngaihtuah bawk ang.

Environment group, South Asia Network on Dams, Rivers and People (SANDRP) hotu, Himanshu Thakkar chuan 4000-MW Etalin HEP kalpui tura EAC-in environment clearance chungchang a ngaihtuah tur chu an duh loh thu a sawi.

"EAC-in 3000-MW Dibang HEP atana cumulative impact assessment nei hmasa loa clearance a pek hnuah 4000-MW Etalin HEP atana clearance pek leh a nih chuan MoEFCC norms palzutna a ni ang," tiin Thakkar chuan a sawi.