Assam-ah vawk 12,000 suat dawn

Assam chief minister Sarbananda Sonowal chuan an state-a African swine fever lenna biala vawk 12,000 dawn chu suat turin Nilaini khan thupek a tichhuak. Vawk neitute chu zángnadawmna pe turin a ti bawk. 

Animal Husbandry and Veterinary Department official chuan state chhunga district 14-ah hri leng vang hian vawk 18,000 an thi tawh tih a sawi. 

CM kaihhruaiin Nilaini khan depart­ment official-te nen meeting neih a ni a, sorkar laipui leh state sorkarin kaihhruaina a lo siam tawh ang leh, expert-te duhdan angin Durga Puja hmain hri lenna district-a hri kai vawkte chu suat vek turin an rel a ni. A suat hna pawh hi thawh ṭan nghal tura tih a nih thu official chuan a sawi bawk. 

Vawk vulhtu, an vawk suat sakte chu an bank account-ah pawisa thunsak an ni dawn a, a hmaa hri vanga vawk 18,000 thi tawh neitute pawh ṭanpuina sum pek rawt a ni bawk a ni.