Manipur : Myanmar aṭanga Kuki hel lut tur nia sawi official-ten an hnawl

Manipur senior official-te chuan Myanmar aṭangin Manipur-ah Kuki hel, training nei zo tawh mi 900 vel lutin pawikhawihna thlen an tum nia tun hnaia sawi awm chu thu belh chian dawl lo a ni tih an sawi.

State Chief Security Advisor Kuldip Singh leh Director General of Police Rajiv Singh te chuan hemi chungchangah hian thuchhuah inṭawm an siam a, he thuthang mipuite ti ralkheltu hi thudik a nih leh nih loh an nemnghehna a awm lo tih an tarlang.

He thuthang hi Thoubal district police aṭanga rawn chhuak niin, September 28-ah khan Myanmar aṭangin helpawl an lo luh thu hi an sawi a ni. Chief Minister office pawhin hemi chungchang hi September 16 khan security official-te lo thawn chhawng bawk. Hei vang hian Manipur hmun hrang hrangah mipuite an ralkhelin hlauhthawnna nasa tak a thlen phah a ni.

Mipuite hlauhthawnna pung zel avang hian Kuldip Singh leh Rajiv Singh te chuan thuchhuah hi an siam a, helpawl an lut dawn nia sawi chungchangah thu dik tak hriat a nih loh thu an sawi. "Mipuite venghim turin security force dah an ni a, uluk takin an thlithlai reng dawn a ni," tiin finfiahna awm lo thuthangte chu ring mai lo turin mipuite an chah bawk.