Assam : Mi bum vangin BJP hruaitu leh mi dang 2 man

Assam BJP-a SC Morcha secretary, Shim Kumar Das leh mi dang pahnih, Birinchi Borkotoki leh Niranjan Das te chu Rs vbc 8 dawn hu sorkar work order lem siam a, company hrang hrang buma puhin Nilaini khan man an ni tih police-te chuan an sawi.

Guwahati Police commissioner Diganta Barah chuan an mi mante hian work order lem an siamte chu company lamah hian hmuhin, an contract thawhnaa tel ve tura sawmin sum an thawh tir niin a tarlang.

An pathum hian Guwahati-ah man an ni a, a hmain an thurualpui dang Deba Prakash Bhagawati pawh CID chuan fraud case dang vangin an lo man tawh bawk a ni.

Borkotoki hi publicity officer chawl tawh niin BN Sarma, joint secretary for 'Adivasi Welfare & development Council' angin a inchhal a, Niranjan Das hi sumdawng mi anga awmin heng company an bum tak aiawhte nena meeting neihna turte hi a lo ruahman a ni. Heng misualte hian Noida-based Prontastic IT (Pvt) Rs cheng vbc 4 leh Bengaluru-based Manpho Exports chu Rs vbc 3.77 man hu work order lem hmangin an bum a ni. Police-te chuan work order lem an siam bakah bank transaction tepawh an chhui nghal bawk. Das hi minister leh party hruaitu hlunte nena inpawh ṭha tak a nih avangin, a chet dan hian sawi leh ngaihven zui a hlawh hle. Barah chuan an tactic hmang hian sumdawng mi dang eng emaw an lo bum tawh a rinawm thu sawiin, an chhui mek tih a tarlang.