Nagaland : Kuminah dengue hri vei 26 hmu chhuak

Nagaland-ah kumin chhungin dengue hri vei hmuh chhuah chu mi 26 an ni a, hetih lai hian kum 2023-a he hri vei hmuh chhuah chu mi 4,943 an awm thung.

He thu hi health and family welfare department-a com­missioner and secretary, Anoop Khinchi chuan Kohim-a meeting a kohah a sawi a ni. He hunah hian National Vector Borne Diseases Control Programme (NVBDCP) state programme officer leh joint director Dr Neisakho Kere ten he natna ti tlem tura awareness campaign neih a pawimawh thu a sawi bawk.

Meeting-ah hian state chhunga dengue hri leng darh zel tur laka inven lawk dan tur zir ho a ni. Khinchi chuan hri leng do chungchanga vantlang mipuite mawhphurhna a sawi pahin Nagaland ah hri vei thar an tlem thu a tarlang. Heng vector-borne disease in natna a thlen theih te do tur hian mipui vantlang te chu an in leh a chhehvel vawngfai tur leh, thosi pian theihna hmun tui tling ti fai turin a chah a, thosi seh lak aṭanga an him theihnan kawr ban tlawn hak te leh long-lasting insecticidal nets (LLINs) hman bakah thosi hlo hmang uar turin a chah bawk a ni.

Khinchi chuan Wokha leh Dimapur-a rubber chinna hmun a tui tling tam lutuk chu sawichhuakin district official-te hnenah a ṭul anga hma lo la turin a ngen. Dengue helpline dinhmun leh damdawiin inbuatsaih dan te, thosilen sem chungchang pawh a sawichhuak bawk.

Kere pawhin NVBDCP ten district hrang hranga awareness campaign ngawrh taka an kalpui thu leh thosi pian theihna hmun te an endik zel thu te, nikuma he hri a darh khan serotype 1 leh 2 an hmuhchhuah thu a sawi lang bawk. He serotype hian mi tam takah immunity insiamin kumina hri vei an tlem chhanah niin a sawi a, serotype 3 leh 4 lo thlen chuan erawh hri kai hi a ti pung thei dawn a ni, a ti. Dengue hri vei te enkawlna tur bik ward siam turin district hospital tin te chah an ni thu a tarlang bawk a ni.