BJP president lawm nan beef party huaihawt

Meghalaya-a pressure group pakhat, Thma U Rangli-Juki chuan Meghalaya-a BJP president Amit Shah lo lawm nan Shillong-a BJP office bulah beef party a huaihawt.

Hynniewtrep National Liberation Council (HNLC) helpawl chuan BJP president Shah-a'n Shillong a tlawh tur denchhenin nimin khan bandh a huaihawt bawk.

Thma U Rangli-Juki con­vener Angela Ryngad chuan India ram inlungrualna leh sakhaw hrang hrangte zalenna kalh zawnga BJP-in policy a kalpui duh loh lantir nan beef party huaihawt an ni tih a sawi.

Thma U Rangli-Juki chuan beef party chu bawngsa leh a soup emaw bawngsa aṭanga thil siamte ei chauh ni loin banner, poster leh auhla hmanga BJP kalphung duhloh lantirna hun a nih thu a tarlang bawk.

BJP rorelna state ṭhenkhat - Maharashtra, Haryana leh Madhya Pradesh te chuan tunhnaiah bawng talh leh a sa zawrh an khap a, hemi tihel nan leh BJP kalphung duh lohna lantir nan BJP president Shah-a'n Shillong a thlen ni-ah Thma U Rangli-Juki chuan beef party hi a huaihawt a ni.

HNLC helpawl pawhin hnam tlem leh sakhaw tê zawkte chunga BJP leh anmahni thlawptu, Sangh Parivar te kalphung duh loh lantir nan nimin khan bandh an huaihawt bawk.

HNLC chuan thuchhuah an siamah BJP kaihhruai NDA sorkarin bawng talh leh a sa zawrh khap a tum chu Khasi leh Jaintia Hills-a mi tam tak eizawnna tichhiatna tur a ni, a ti.

HNLC te bandh huaihawt vang hian nimin khan venhimna khauh taka kalpui a ni a, state sorkar chuan mipuite chu bandh zawm lo tur leh sorkar hnathawkte chu office kal vek turin a ngen a ni.