Arunachal zirlai pahnihin mi kut an tuar

India ram khawpui hrang hranga hmarchhak mite chunga chi inthliar­na lam hawia tharum thawhna thlengah Aru­nachal Pradesh mi Jour­nalism zirlai pahnih chu Thawhlehni tlai khan Bangaluru-ah mi pali-in kut an thlak.

Arunachal zirlai pahnihte hi chhungkhat inhnai tak niin, mipa leh hmeichhia an ni a, hmeichhia hi mipat hmei­chhiatna lam hawia khawih a ni bawk.

"Shantinagar bus stand bulah two wheeler-ah ka cousin nen kan inphur a, zan dar riat velah zu rim nam mi pahnih min lo pan hnai a, min lo chhaih nghal a, sap ṭawng dik lo tak taka hmangin tawngkam mawi lo tak takin min ṭawngkhum bawk a, ka cousin chuan a helmet a hlip a, ani pawh chu chi inthliarna lam hawi, mawi lo tak takin an ṭawngkhum bawk a ni," tiin vanduaina tawk hmeichhia chuan a sawi.

"Ka cousin chu chhan awm loin kut an thlak bawk a, a hnuah mi pahnih an lo kal belh a, pakhat chuan commi­ssioner fapa a nih thu a sawi nghe nghe a ni." tiin Arunachal zirlai hmei­chhia chuan a sawi belh.

Vanduaina tawk zirlai pahnihte hian an chunga thil thleng chu police te an hriattir hnuah police te chuan puih an tum lo niin an sawi a, Police Commissioner M.N. Reddi twitter account-ah complaint an thlen thu an sawi.

Police Commissioner Reddi chuan twitter-a an complaint chu chhang­letin, kutthlaktute thiltih chu a dik loh thu leh pawikhawihtute chu hrem an nih tur thu a tarlang a, an chunga thil thleng chu divisional Deputy Commissioner hnena thlen turin a lo hriattir a ni. Hemi hnu hian zirlai pahnihte hian an thil tawn chu Ashoknagar police te hnenah ṭawngkamin an hriattir a ni.