BTC-in sorkar laipui aṭangin direct funding a phut

Assam sorkarin fund a tihkhawtlaisak ṭhin lak aṭanga harsatna sutkian nan Bodoland Territorial Council (BTC) chuan sorkar laipui aṭangin direct funding a dil.

BTC-a sorkar thar piang chuan Bodoland Territorial Autonomous Districts (BTAD) huam chhunga cheng, mipuite beiseina puitlin turin theihtawp an chhuah tur thu an tarlang.

BTC deputy chief Khampa Borgoyari chuan Assam sorkarin BTC fund a tih­khawtlai avangin BTAD huam chhunga hmasawnnain a tawrh phah ṭhin a ti a, Assam sorkar plan fund chu mipui tam dan azira pekchhuah tur a ni, a ti. Plan fund aṭangin BTC chuan 12.19% a chang tur a ni, tiin tunhmaa Assam sorkarin Plan fund aṭanga BTC a pek chuan 5% a tlin ngai loh thu leh a hun taka pek a nih loh thu Borgoyari chuan a sawi bawk a, BTC chuan first installment chu July emaw August thlaa a dawn ṭhin thu a sawi.

BTC deputy chief chuan Assam sorkar aṭanga fund an dawn dana harsatna awm chu sorkar laipuiin state sorkar kaltlang loa direct-a fund a pek chauhin sutkian theih a ni, a ti.

BTC sorkar thara hruaitute chuan BTC member lakluhna inkhawma rinawmna thu an tiam zawh hnu lawkah direct funding an phut chungchangah Assam Governor an hmu nghal a, Governor chuan a lo bawhzui tur thu a sawi.

BTC thil ngaihpawimawh hmasak tur chungchang sawiin Borgoyari chuan BTAD huam chhunga remna leh muanna thlentir chu thil pawimawh hmasa a ni, a ti a, mipuite thil beisei tih puitlin nan theihtawp chhuaha hma an lak tur thu a sawi.

BTC-a rorellai Bodoland People’s Front (BPF) hian a zawna term thum thlan tlin a nih hnuah mawhphurhna leh hmabak lian tak a hmachhawn nghal a, BTAD huam chhunga dan leh thupek dinhmun siamṭhat ngaite chu BTC sorkar thar fiahna tur a ni ang.

BTC deputy chief Borgoyari chuan BTAD huam chhunga dan leh thupek dinhmun chhiat chungchangah Assam sorkarin BTC a puh ṭhin thu a sawi a, dan leh thupek lekkawh kawnga Assam sorkar hlawhchhamna chuan hmasawnna a nghawng bakah tourism sector pawh a chhe zawngin a nghawng nasa hle, a ti.

Manas National Park chu BTC-in khualzin mite hmunpuia siam tum ṭhin mah se dan leh thupek mumal lo lutuk chuan an hmalakna awmzia a neihtir loh thu a sawi bawk.