APDCL leh DVC-in power leina tur thuthlung an ziak

Assam Power Dis­tribution Company Li­mited (APDCL) chuan Damodar Valley Corpo­ration (DVC) chu power megawatt 75 leina tur thuthlung a ziahpui.

APDCL chuan thu­thlung angin kumin May 1 aṭangin thla thum chhung DVC hnen aṭangin power a lei ang.

APDCL aiawhin General Manager MK Adhikary leh DVC ai­awhin Executive Director (Commercial) Amitava Nayak te'n thuthlung hi an ziak a, thuthlung ziahnaah hian APDCL Chairman KV Eapen, APDCL MD RL Barua leh DVC Chairman AWK Langstieh te pawh an tel.

APDCL chuan power lei tur hian hun eng emaw chen chu Assam ma­mawhna a phuhruk tur thu a tarlang a, power leibelh nan company dang pawh an biak thu a tarlang bawk.

Assam chuan off-peak-hour, chhun khaw en laiin power indaihlohna a neih loh thu APDCL chuan a tarlang a, mahse peak hour, zan dar 6 aṭanga dar 11 inkarah power MW 100 vela indaih­lohna an neih thu a tarlang.

Tunah hian Assam-in peak-load-hour-ah power MW 1200 leh off-peak-load hour-ah MW 850 a mamawh a, power MW 1150 a nei thei thung.

Assam power ma­mawh­na hi April thla aṭangin a sang chho a, August thla hi power mamawh sanna ber a ni. Nipui lo thleng turah peak-load-hour-a power mamawhna hi a sang chho zel dawn a, MW 1300 aṭanga MW 1350 thlenga a san chhoh rin a ni a, off- peak-load hour-ah pawh MW 1000-a mamawhna a san rin a ni bawk.