NABARD-in Meghalaya tan vbc 2,205 ruahman

National Bank for Agriculture and Rural Development (NABARD) chuan kum 2015-2016 chhunga Meghalaya-a project kalpuina atan cheng vaibelchhe 2,205 a ruahman. Hei hi kum hmasaa sum a ruahman aiin 19%-in a tam.

Ruahmanna ang chuan agriculture and allied activities-ah cheng nuai 75,568.26 dah a ni a, non-farm sector-ah nuai 52,819.08 leh priority sector, self-help group ang chite tan nuai 92,178.91 dah a ni bawk, tiin NABARD Deputy General Manager KL Prabhakar chuan a sawi.

Meghalaya mihring awm zawng zawng aṭanga agriculture lama inhmang 70% te sum lakluh tihpun chu NABARD project hian a tum ber a, agriculture aṭanga Meghalaya sum lakluh hi Gross State Domestic Product (GSDP) aṭangin 22% chauh a ni.

Prabhakar chuan constant prices (2004-05) aṭanga teha kum 2013-14-a GSDP chu vaibelchhe 13,465 a ni a, kum 2012-13-ah vaibelchhe 11,978 niin, a punna hi 12.41% a ni, a ti.

12th Five Year Plan (2012-17) chhungin GSDP chu 8.76-a tihpun hman an tum thu Prabhakar chuan a sawi bawk a, primary sector chu 3.12%, secondary sector 10.22% leh tertiary sector chu 10.0% tihpun theih an beisei thu a sawi bawk.

Kum 2013-14 GSDP-a primary, secondary leh tertiary sector share te chu 16.42%, 29.47% leh 54.09% a ni.

NABARD Deputy General Manager Prabhakar chuan Meghalaya per capita income chu state dang zawng zawng average aiin 10%-a a hniam thu a sawi a, ṭhalai an pun zel avangin hnathawh tur siamsak zel a pawimawh thu a sawi bawk.