GNLA helte'n police convoy an lambun

Garo National Libera­tion Army (GNLA) helte chuan Thawhlehni zan khan South Garo Hills district, Nangalbibra hmunah police convoy an lambun a, police pathum leh civil mi pahnihin hliam an tuar.

Tun ṭuma thilthleng hi thla khat chhunga GNLA te'n police convoy an lambun vawi hnihna a ni.

South Garo Hills district, Panda reserve forest-ah March 10 khan GNLA te hian police convoy an lo lambun tawh a, police pali an thih bakah pahnihin hliam an tuar.

Thawhlehni zan khan South Garo Hills police te chu Rongara police station aṭangin district headquarters, Baghmara-ah BSF sipaite thlahin, lirthei pahnihin an kal a, an let lamah Nangalbibra bula Jadigittim hmunah GNLA helte hian an lo lambun a ni.

Police convoy hian Jadigittim bazar-a petrol station pana a tlan laiin helte hian kawngsira an IED bomb kam an tipuak a, hei hian a hmasa zawka tlan police gypsy a tichhiat bakah a chhunga chuang police pathumin hliam an tawrh phah bawk. Bomb puah laia a bul hnaia awm civil mi pahnihin bomb si per hi tawng fuhin, hliam an tuar bawk.

Bomb puah hnu hian GNLA helte hian police te hi an kap zui nghal a, police te hian theihtawp chhuaha chhangletin, Nangalbibra leh Jadigittim hmuna police awmte an pun nghal bawk a, minute 20 chhung vel an inkah hnuah helte hi an ram lamah an tlanchhia a ni.

GNLA helte hian po­lice te ralthuam chhuhsak an tum ber a, mahse an hlawhchham a ni, tiin po­lice pakhat chuan a sawi.