PM Modi-a'n Tripura Mandwai block a chawimawi

Prime Minister Narendra Modi chuan Thawhlehni khan Tripura-a, Mandwai block chu chawimawina a hlan.

Mandwai block hi sorkar laipui policy pakhat financial inclusion leh financial literacy-a an chet ṭhat avanga chawimawi dawng an ni a, he block-a a tribal chhungkua zawng zawng chuan bank account an nei vek a ni.

Mandwai Block Develop­ment Officer (BDO) Monohar Biswas chuan mihring 55,050 awmna, chhungkaw 12,910 zingah bank account nei mi 21,984 an awm a, chhungkaw pakhat aṭangin bank account pakhat aia tam nei an awm a ni, a ti.

Mandwai RD block-a mi­hring awm zawng zawng aṭanga 95% hi tribal an ni.

Mandwai hi Tripura khaw­pui, Agartala hmar lamah kilometre 30 vela hla a ni a, kum 1980 chho khan chi leh chi kara buaina leh sorkar laka helna avangin mi tam tak chu chenna nei loin, hmun dangah an pem a ni.

West Tripura District Ma­gistrate Abhishek Singh chuan, "Banking and financial services-ah Mandwai block chu 100% a hlawhtling a, midangte tana entawn tlak a ni," a ti.

Mandwai BDO Biswas chuan thingtlang khaw mipuite'n bank account nei ṭulna pawh an hriat loh thu sawiin, financial inclu­sion leh financial literacy-a an hlawhtlinna atan hian general-cum-financial literacy camp vawi 180 chuang an neih thu leh in tinah lutin an campaign thu a sawi.

Tripura-a mihring maktaduai 3.7 aṭangin hmun thuma ṭhena hmun khat hi tribal an ni a, kum 1993-ah state literacy rate chu 55% niin, kum 2015-ah chuan literacy rate-a India rama sang ber, 96% an ni tawh a ni.