Nagaland : Dimapur airport aṭangin Shankaracharya thawn let

Nagaland-a bawng talh khap leh bawng humhalhna thlawpna lantir a, Gau Dhwaj Yatra (cow protection march) hmang tura kal, Shankaracharya Swami Avimukteshwaranand Saraswati leh a team te chu Ningani, September 28 khan Dimapur airport aṭangin thuneituten an thawn let leh.

Shankaracharya Swami Avimukteshwaranand Saraswati leh a team te hi Dimapur airport an thlen hnuah airport hi an chhuahsan phalsak an ni loa, VIP lounge-ah hun rei vak lo an chawlh hnuah an kir leh ta a ni. Nagaland sorkar chuan September 28-a Kohima-a yatra hman phalna hi a phalsak lo a ni.

Chumoukedima deputy commissioner Polan John chuan sorkarin he yatra hi hman a remtih loh avanga airport chhuahsan an phal sak lo tih a sawi. Shankaracharya hi lungawi lo deuhin airport chhuahsan an phal loh chungchangah a tir lamah chuan a lungawi lo deuh a, mahse cabinet thutlukna siam tawh an zawm mai a ni tih an hrilh hnuah erawh chuan a hrethiam zui ve a ni, a ti.

Dimapur police commissioner Kevithuto Sophie chuan September 12 khan state sorkar chuan thuchhuah a siam tawh tih a sawi a, yatra neih tum hi state mipuiten an duh loh avangin buatsaih a nih chuan buaina a chhuah mai a hlauthawnawm tih a sawi. Hei vang hian Constitution-a Article 371(A)-a Nagland mipuite himna turin khapna hi hman a ni, a ti. Naga Students' Federation pawhin yatra neih tur hi dodalin, nawrh huaihawtah an lo vau tawh bawk.

AAPSU ten Sankaracharya an dang

Arunachal Pradesh-ah pawh All Arunachal Pradesh Students Union (AAPSU) chuan Sankaracharya Avimukteswarananda Saraswati Maharaj leh a team te hi an lo dang bawk.

AAPSU leh Sankaracharya team te hi Donyi Polo airport-ah darkar khat vel an inhmachhawn hnuah Sankaracharya team hi an kir leh ta a ni.

Sankaracharya hian Gau Dhwaj Yatra hmang turin Arunachal Pradesh hi a tlawh a, mahse AAPSU chuan hei hi duh loin, an state-a tribal mite ei leh in chungchanga inrawlh tumna niin an puh a ni.

AAPSU general secretary, Ritum Tali chuan an pawl chuan sakhuana, mimal leh zirna chungchangah dodal bik engmah an nei lo tih a sawi a, mahse mipuite ei leh ina inrawlh tumna erawh an duh lo tih a sawi. " Hindu ten bawng hi serh mah se tribal mite tan chuan an chaw pangngai ve mai a ni. Hei vang hian tihsual nei lo tribal mite nitin ei leh ina midang inrawlh hi kan pawm thei ngai lo ang," a ti.