Dalai Lama hming chawia tlang hming phuah China in duh lo

China chuan India tlanglawn miten Arunachal Pradesh-a tlang pakhat hming atana 6th Dalai Lama hming an chawi tur chu a duh loh thu a sawi.

Sorkar enkawl, National Institute of Mountaineering and Adventure Sports (NIMAS) team te chuan tun hnaiah Arunachal Pradesh-a tlang, hming la nei lo feet 20,942-a sang chu teh chhuakin 6th Dalai Lama, Tsangyang Gyatso chawimawina atan a hming hi an puttir zui a ni.

Defence Ministry chuan tlang hming an puttirna chhan hi sawifiahin, 6th Dalai Lama hian a finna leh theihnate chu Monpa hnam leh midangte tan nasa takin a lo hmang tawh a ni, a ti.

Mahse China chuan hei hi a pawm lo a, Foreign Ministry thupuangtu Lin Jian chuan Zangnan, China-in Arunachal Pradesh hming aia a hmang chu China ram chhung ani tiin, India-in a ram chhung anga a rawn sawi leh cheibawl chu dan kalh a ni tiin a sawi. "Zangnan hi China ramchhung ami a ni a, India mi ten Arunachal Pradesh an rawn ti ringawt pawh hi awmze nei lo a ni. He buaina hian ram pahnih imhmuhthiam lohna awm sa chu a chawk tho leh a ni," tiin a sawi.