Nagaland : Zirlai pawlin APSPA pawhsei an dem

Naga Students’ Federation (NSF) chuan Nagaland-a district pariata Armed Forces Special Powers Act (AFSPA) pawhsei chu na takin an dem bakah, an dodal tih an sawi.

Union Ministry of Home Affairs-in kar liam ta Ningani khan Nagaland-a Dimapur, Niuland, Chiimoukedima, Mon, Kiphire, Noklak, Phek, leh Peren district-ahte thla ruk chhung atan AFSPA pawhsei a nih thu a sawi a ni. Hei bakah hian district pangaa hmun ṭhenkhatah pawhsei ni bawkin, hei hi October 1, 2024 aṭanga hman tur a ni.

NSF chuan AFSPA pawhsei a ni hi an duh loh thu sawiin, “Sorkar laipuiin midang rawn loa hetiang thutlukna midang rawn loa a siam ringawt kan dem tak zet a, Naga mipuiten hun rei tak ata tawh he dan khirh tak titawp tura a ngenna chu eng atan mah an ngaih lohzia a ti lang chiang hle,” tiin NSF president Medovi Rhi leh general secretary Chumben Khuvung-te chuan thuchhuah an siam.

"AFSPA dan hnuaia sipaite kuta thuneihna zau tak awm hi kum tam tak chhung kan mite hnuaichhiahna hmanrua atan hman a ni a, mihring nihna chanvo tam tak a palzut bakah, mipuite a ti ralṭi in security mi leh sate an duh dan ang angin kan ramah an khawsak theih phah,"tiin thuchhuah chuan a tarlang.

Nagaland chu ram ralmuang a ni chung leh hmasawnna kawng a zawh mek chunga AFSPA pawhsei zel a ni chu sorkar laipuiin Naga mipuite chanvo leh theihnate a hmuh duh lohzia lan chhuahna chiang tak nia an ngaih thu zirlai pawlin an sawi. AFSPA dik lo taka pawhsei zel a ni hian, mahnia dinchhuah tumna kawnga an beihnate chu engmah loah a chantir bakah sorkar laipui an rin ngam loh phah tih an sawi bawk.

Nagaland chu “disturbed area” a nih tawh loh avangin hetiang dan hi hman a ngai tawh lo tih sawiin NSF chuan, Naga mipuite emaw an aiawhte emaw tumah rawn loa AFSPA pawhsei a ni leh ringawt chuan an ngaih a ti ṭha lo hle tih an sawi. NSF chuan Nagaland-a AFSPA hman mek chu hlip nghal turin sorkar laipui an phut a ni.