Tripura : Sorkarin tourism tih hmasawn nan Rs vbc 692 MoU ziak

Tripura sorkar chuan ropeway sakna tur Rs vbc 692 hu Memorandum of Understanding (MoU) a ziak. Hei hi state chhunga tourism hmasawnna tur atana tih a ni.

MoU ziah a nih thu hi kar liam ta Zirtawpni khan World Tourism Day den chhenin chief minister Manik Saha chuan a puang a, inkalpawhna ṭha zawk neih theihna tur leh zin mite hipna tura ropeway sak project chu siam a nih thu a sawi.

MoU hi Tripura Tourism Development Corporation Limited leh National Highways Logistics Management Limited-te inkarah ziah niin, he project hnuaiah zin mite tlawh ṭhin hmunte chu ropeway-a thlunzawm tum a ni. Ropeway hi Udaipur Railway Station - Matabari, Maharani - Chabimura, Surmachara, leh Jampui Hills-ahte siam tura ruahman a ni.

Chief Minister chuan zin mite hip hi state mai bakah ram pum economy ṭhanlenna hmanraw pawimawh tak a ni tih a sawi. Tripura state-ah zinmite hip thei hmun pawimawh tak tak Tripura Sundari Temple, Kasba Kalibari, Fourteenth Goddess Temple, Amarpur-a Mangalchandi Temple, leh Mahamuni Pagoda-te a awm tih sawiin CM chuan, Udaipur-a Matabari pawh siamṭhat hna a thawk mek a ni a, Narkelkunka leh Dumbur-te pawh zin mite tana tlawh chakawm lehzual siam a tum tih a sawi.

Heng bakah hian zin mite hip leh zual tura Tripura sorkarin state chhunga hmalakna a kalpui tawh leh kalpui mek hrang hrangte pawh sawiin CM chuan, Chabimura, Kailashahar hmuna Sonamukhi te, Chaturdash Devata Temple, leh Kasba Kali Temple-te cheiṭhatnan Rs vbc 180 ruahman a nih thu a sawi bawk.