Ramri chungchangah Assam leh Meghalaya indawr leh dawn

Meghalaya chief minister Conrad K Sangma chuan ramri buaina chinfel dan tur ngaihtuahin Assam nen kumin October thla hian inbiakna an nei leh dawn tih kar liam ta Zirtawpni khan a sawi.

Chief Minister chuan ramri ṭhenkhat chu awlsam taka ṭhen hran mai theih a ni lo a, state pahnihte hian dik taka hma an lak theih nan sawi hona uluk taka neih a ṭul tih a tarlang.

Ramri buaina chinfel dan ngaihtuah hian state pahnihte hian meeting an nei fo ṭhin tih sawiin, CM Sangma chuan Assam CM Himanta Biswa Sarma pawh official loin vawi eng eng awm zat a lo sawipui tawh tih a sawi bawk.

Assam leh Meghalaya hian km 884.9 a sei ramri an inṭawm a, hmun 12-ah ramri buaina hi an nei a ni. Mahse kum 2022 March thla khan ramri buai paruk chinfelna tur chu New Delhi-ah union home minister Amit Shah hmaah state pahnihte hian an lo ziak tawh. Ramri buai chinfelna tura inremna thawh khatnaah hian 36.79 sq.km-a sei huamin, Assam lam hian 18.46 sq.km leh Meghalaya lam hian 18.33 sq.km in an in sem. Ramri buai la chinfel ve lohte chu thawh hnihnaah hian an ngaihtuah dawn a ni.