Meghalaya-ah hri kai 3,000 chuang tawh

Meghalaya state-ah hri kai hmuh chhuah belh mi 88 awm lehin, Covid-19 kai hmuh tawh hi mi 3,005 an awm tawh. 

Pathianni khan Covid-19 vangin East Khasi Hills district ami, mipa kum 59 mi a thi a, ani nen hian an state-a hripui vanga thi hi mi 16 an awm tawh bawk a ni. Hemi ni vek hian hri kai enkawl dam mi 29 an awm bawk. 

Official-te chuan state pumah sample 97,550 endik a ni tawh tih sawiin, an zinga 3,005 chu an positive a, mahse hri kai zingah a tam zawk chu enkawl dam an ni tawh. Enkawl mek hi mi 1,433 an la awm a ni. 

Manipur-ah pawh hri kai an pun belh zel a, hri kai hmuh chhuah hi Pathianni khan mi 7,022 an tling tawh a ni. 

Covid-19 Common Control Room, Imphal chuan hri kai hmuh thar 139 awmin, an zingah security force mi leh sa 18 an tel tih a sawi. Tualchhung mi hri kai hmuh tharte hi hmun danga zin chhuahna nei lo vek an ni tih a tarlang bawk. 

Hri kai zinga mi pahnih, mipa kum 53 mi leh hmeichhia kum 31 mi chu an thih belh leh a, anni nen hian Covid-19 thihpui hi mi 38 an awm tawh a ni. An state-a hri thihpui hmasa ber chu July 29 khan a thi a ni. 

Pathianni thleng khan sample 1,72,650  endik a ni tawh. Hri kai zinga 5,164 chu enkawl dam an ni tawh a, recovery rate hi 73.54% an tling. 

Imphal khawpuiah hri len chung changah awareness campaign neih mek a ni a, mipuite chu hri leng laka inven dan tur te, ina inkhung hran chungchang te, mask pawimawh leh hriselna leh faina lam ngaih pawimawh a ṭul thute inzirtir a ni. 

He awareness campaign hi health department, Indian Red Cross Society Manipur Branch, Indian Medical Association Manipur state branch leh tualchhung club-ten an buatsaih a ni.