Hmarchhakah bawng talh khap a ni lo ang: BJP secretary

BJP national general secretary Ram Madhav chuan sorkar laipuia BJP kaihhruai NDA sorkarin hmarchhak bialah bawng talh leh a sa zawrh khap a tum loh thu Nilaini khan a sawi.

Madhav chuan he thu hi chanchinthar thehdarhtute hmaah sawiin, bawng talh khapna India ram state hrang hrangah hun rei tak kalta aṭanga kalpui a nih tawh thu a sawi a, sorkar laipui chuan mipuite ngaihtuah chungin hmarchhak bialah bawng talh leh a sa zawrh khap a tum loh thu a sawi.

"Khawtlang nunphung leh an thurin te'n a nghawng avangin state ṭhenkhatah chuan bawng talh leh a sa zawrh khap a ni a, hei hi sor­kar laipui chuan a ennawn dawn a, a ennawn hnuah a ṭul angin hma a la ang," a ti.

Hindu kulmuk te'n Ghar Wapsi (sakhaw inlehna) an kalpui chungchangah BJP national secretary chuan India ram chu sakhaw hrang hrang vuantute awmna a nih thu leh mipuite rilruah ngaihdan leh thurin hrang hrang a awm thu a sawi.

"Boruak muanawm tak hnuaiah thlamuang taka sakhua zawng zawng leh hnam tinte an awm ho theih nan sorkar chuan theihtawp chhuahin a bei zel ang," a ti.

Hmarchhak biala BJP dinhmun chungchang sawiin Madhav chuan an party chu a ṭhang lian mek zel a ni, a ti a, BJP kaihhruai sorkar laipui chuan hmarchhak bial hmasawnna a ngaihpawimawh thu leh BJP chuan hmarchhak bial tana sorkar hmalakna chu a thlawp zel tur thu a sawi.

BJP president Amit Shah-a'n Shillong a tlawh den­chhena pressure group pakhat­in beef party a huaihawt chung­changah Madhav chuan democracy ramah mi tu pawhin dodalna an lantir theih thu a sawi a, mahse beef party huaihawtute chuan an thil tum an ṭhelh a ni, a ti.

"BJP chuan India ram mipuite lungrualna leh thawh hona atan a bei zel dawn a ni," a ti.