Tripura-in hmanhmawh turin DoNER a nawr

Agartala airport tihchangtlunna atana project kalpui tur chungchangah Tripura chuan thil ṭulte chak zawka bawhzui turin Development of North Eastern Region (DoNER) a ngen.

DoNER Secretary kaihhruaina hnuaia April 13-a New Delhi-a meeting neihah Tripura transport secretary Samarjit Bhowmik chuan Agartala Airport-a terminal building sak turah inrawlh turin DoNER Minister a ngen a ni.

Bhowmik chuan chuan terminal building sak nan state sorkarin ram acre 72-a zau, cheng vaibelchhe 35-in a lei fel tawh thu a sawi a, Airport tihchangtlunna tur chu tihkhawtlai loin Airport Authority of India (AAI)-in a kalpui thuai a ngai a ni, a ti.

AAI official chuan Bhowmik chu chhangin Airport tihchangtlunna project atan Ministry of Environment and Forest aṭangin environmental clearance an la hmuh loh thu a sawi a, Agartala airport-ah hian thlawhtheihna dahna tur, hangar siam an tum thu leh hemi atan hian detailed project report (DPR) pawh DoNER ministry-ah an thehluh tawh thu a sawi.

Tripura transport secretary chuan AAI official chu Tripura-a thlawhtheihna thlawk tihpunsak turin a ngen bawk.

"Agartala airport hi hmarchhak biala thlawhna ṭumhmun lian ber dawttu a ni a, kum 2013 khan passenger nuai riat an awmin, tunah chuan passenger nuai kua-ah an pung tawh a ni," a ti.

Bhowmik chuan meeting-ah hian Agartala-Kamalpur-Agartala-Kailashahar inkara thlawhtheihna service tir chungchangah DoNER chu 'viability gap funding' kalphung hmanga fund ngaihtuah tur a nih avangin DoNER secretary chuan a phurpui lutuk lo niin a sawi.