Gogoi-a'n welfare scheme chak zawka kalpui a duh

Assam Chief Minister Tarun Gogoi chuan mipuite hamṭhatna scheme hrang hrang chu chak zawka kalpui a duh thu sawiin, hun bithliah­a fast-track delivery system kalpui ṭha a tih thu a sawi.

Assam Administrative Staff College-a Deputy Commissioner (DC) leh Superintendent of Police (SP) conference-ah Gogoi chuan he thu hi a sawi a, DC te chu mi hnuaihnung leh rethei zawkte tan chak zawka hna thawk turin a ngen.

Sorkar inrelbawlna chu a bulṭhut avanga a fel a pawimawh thu sawiin, district thuneitute leh department hotute chu an department-in scheme hrang hrang a kalpuite a hmuna enfiah ṭhin turin a ngen bawk.

Health, education leh agriculture sector hnuaiah mipuite'n service ṭha zawk an neih theih nan DC te chu infrastructure tihchangtlunna tur rawtna siam turin Gogoi chuan a ngen.

Assam Chief Minister chuan economic lamah chak zawka hmasawnna a kal theih nan state sorkar inpekna hrang hrang a tarlang bawk a, rural development block hna thawk ṭhate tan lawmman siam a rawt.

Sorkar scheme hrang hrangte mipuite'n an hriat­chian theih nan district thuneitute chu thuziak tarna atan sorkar ruahmanna siamte bawhzui ṭhin turin a ngen bawk.

Chief Minister Gogoi chuan district thuneitute chu pension scheme leh ek-in siam­na project te chu harsatna awm loa kalpui a nih theih nan thil ṭulte a rang lama bawhzui ṭhin turin a ngen bawk a, mipuite tana sorkarin welfare scheme hrang hrang a ruahmante chu mumal taka kalpui a pawimawh thu a sawi.