Fund pe chhuak thuai turin NGT-in Assam sorkar hriattir
National Green Tribunal(NGT) chuan Kaziranga leh Manas national park-a ramsa humhalhna atana fund ruahman chu kar hnih chhunga pechhuak turin Assam sorkar a hriattir.
Justice U D Salvi awmna NGT bench chuan national park ramte miin a ruka an luah ṭhin lakah Assam sorkar chu park venghim zo loah a puh bawk a, mimalin ram an luah chungchanga a hmalakna report kar li chhunga thehlut turin a hriattir nghal.
Assam sorkarin state chhunga tiger reserve te hnenah fund a pekchhuah loh avanga National Tiger Conservation Authority (NTCA)-in Assam Chief Secretary hnena a lungawi loh thu March 19, 2015-a a thawn chu tarlangin NGT bench chuan fund chu NTCA hnen aṭangin Assam-in a dawng tawh a, mahse Assam sorkar chuan fund hmanna tur a tihkhawtlai nge a la hman loh chhan a hriat duh thu a sawi.
"Assam sorkar chuan fund a la pechhuak lo a nih chuan kar hnih chhunga pechhuak turin kan hriattir nghal a ni," tiin NGT thuchhuak chuan a tarlang.
Assam sorkar laka NGT-a petition thehluttu, RTI activist Rohit Choudhary aiawha inlan, advocate Ritwick Dutta chuan mimalin national park ram an luah chungchangah Assam sorkarin hmalakna mumal a neih loh thu NGT a hriattir a, Kaziranga nation park chhung, motor kawngpui sira dawr leh restaurant te chu khar turin NGT-in thuchhuah siam tawh mahse Assam sorkar chuan hmalakna a la nei lo a ni, a ti.
RTI activist Choudhary hian Kaziranga National Park chhunga kawngpui, National Highway-37 sorkarin zauh a tum chu ramsa te himna atan a ṭha lo tiin, NGT-ah petition a thehlut a ni.
"NH-37-a lirthei tlante khuahkhirh an nih loh avangin lirthei lakah ramsa leh rannung tam takin nunna an chan phah a ni," tiin Choudhary chuan a sawi.