NE-in skill development infrastructure nei ṭha lo

Union Minister of State for Skill Development and Entrepreneurship Rajiv Pratap Rudy chuan hmarchhak biala skill development infrastructure te chu bial mipuite mamawh phuhruk nan a ṭhat tawk loh thu a sawi.

Lok Sabha inkhawma ziaka zawhna a chhannaah Union Minister Rudy chuan he thu hi a sawi a, hmarchhak bialah Industrial Training Institutes (ITI) 80 a awm thu leh heng zinga 72 chu sorkar enkawlna hnuaia a awm a nih thu a sawi. ITI pariat chu mimal enkawl hnuaia awm a ni.

"Mipuite mamawh phuhruk nan hmar­chhak bialah skill development infrastructure a ṭha tawk lo a, sorkar chuan ITI thar hawn belh tumin hma a la mek a ni," a ti.

ITI hawn belh turte chu sorkar laipui chuan public private partnership (PPP) kal­phunga kalpui a tum thu sawiin Rudy chuan hmarchhak biala private company lian an tam loh avangin PPP mode-a kalpui turah rua­hmanna tihfel an la neih loh thu a sawi bawk.

Zawhna dang chhangin Union Skill Development and Entrepreneurship Minister Rudy chuan February 28, 2015 thleng khan National Skill Development Corporation (NSDC) chuan approved partner 207 a neih tawh thu a sawi a, NSDC partner centre hman theih 2,904 an neih thu leh mobile centre 676 an neih tawh thu a sawi bawk.

NSDC centre te hi state 28 leh union territory pangaa district 471-a awm an ni.

Union Minister Rudy chuan PPP mode hmangin India rampumah ITI 1,277 chu tihchang­tlun a nih tawh thu leh mimal enkawlna hnuaiah ITI 9,688 hawn a nih tawh thu a sawi bawk.

Private company te hnenah NSDC chuan cheng vaibelchhe 815 a pek tawh thu sawiin heng zinga vaibelchhe 643 chu loan anga a pek thu leh grant angin vaibelchhe 150 leh equity ang­in vaibelchhe 22 a pekchhuah tawh thu a sawi.