Helpawl pakua-in joint front an din
Hmarchhak biala helpawl pakua chuan chak zawka an thil phut nawr nan ṭangrual pawl, joint front an din.
Joint front-ah hian Assam hel ULFA(I), Bodo hel NDFB(S) leh Naga hel NSCN(K) te pawh an tel a, India security agency te chuan he thilah hian China a inhnamhnawih an ring.
Thla khat kalta chhung khan helpawlte hian Myanmar-ah meeting vawi thum an nei a, hemi hnu hian joint front te hian an pawl hmingah United National Liberation Front of West South East Asia (UNLFW) tih an vuah a ni.
Indian intelligence agency report chuan NSCN(K) chairman SS Khaplang chu helpawl ṭangrualte hian hotuah an ruat a ti. ULFA(I) hotu, Paresh Barua chu vice-chairman emaw commander-in-chief emaw ah ruat a ni tih report ṭhenkhat chuan a tarlang bawk.
Helpawl pathum - ULFA(I), NDFB(S) leh NSCN(K) te bakah hian Manipur-a helpawl paruk inzawmkhawm, CorCom chuan joint front hi a zawm bawk a ni.
CorCom-ah hian Kangleipak Communist Party (KCP), Kanglei Yawol Kanna Lup (KYKL) leh People’s Revolutionary Party of Kangleipak (PREPAK) helpawlte bakah pawl dang pathum an tel bawk.
Indian intelligence report chuan India leh China ram inchuh thubuai chungchangah China-in India sorkar a nawr nan joint front dinnaah hian a inhnamhnawih an rin thu an tarlang.
India chuan a ramchhungah Dalai Lama kaihhruaiin kum 1959 khan Himachal Pradesh, Dharamshala-ah Tibetan government-in-exile din a lo phalsak tawh a, hemi chhanletna atan hian China chuan hmarchhak helte'n rampawna sorkar an din theih nan hma a lakpui nia an ngaih thu intelligence report chuan a tarlang bawk.