Congress-in NE tan engmah a tihsak lo: Amit Shah

BJP national president Amit Shah chuan sorkar laipuia Congress party-in kum 60 ro a rel chhungin sum tam tham tak tihchingpen bak India leh hmarchhak tan engmah a tih loh thu Ningani khan a sawi.

BJP president Shah chuan he thu hi Arunachal Pradesh khawpui, Itanagar-a Nyakum Lapang Ground-ah a sawi.

Congress party chuan ro an rel chhungin cheng vaibelchhe nuai 12 ching­pen bak India tana thiltih a nei lo, a ti.

"Hei vang hian Congress laka lung­awi lote chuan nikum Lok Sabha in­thlanah hnehna sang tak min chantir a ni," tiin, Congress party chuan mipuite min run a ni, a ti.

Prime Minister Narendra Modi-a kaihhruai NDA sorkar chuan kawng dik a zawh chho mek a, hei hi India rampuma inflation rate tlahniamin a lantir a ni.

Tun ṭum hi Amit Shah-a'n Arunachal a tlawh vawi khatna a ni. Shah chuan Arunachal chu hmarchhak state zinga ram mawi ber a tih thu sawiin, state mipuite chuan leilung malsawmna tam tak an dawng a ni, a ti a, mahse Congress sorkar chuan Arunachal Pradesh state a din aṭangin leilung hausaknate hi a haichhuak thei lo a ni, a ti.

Shah chuan Prime Minister Modi-a'n hmarchhak mipuite hamṭhat nan scheme hrang hrang a ruahman te tarlangin, vaibelchhe 7,000 senna tur ruahmanna a siam thu a sawi.