Assam-ah voter dinhmun chiang lo nuai 1.41 an awm: Election Commission

Election Commission chuan Assam electoral roll-ah Bangladesh leh Pakistan mi an tel tih chu pha mah se voter dinhmun chiang lo, 'Doubtful Voters' tia 'D' category zinga a dah mi nuai 1.41 an awm thu a tarlang.

He thu hi Union Minister of Law and Justice DV Sadananda Gowda chuan Lok Sabha inkhawma zawhna a chhannaah a sawi a, Assam electoral roll-a Bangladesh leh Pakistan mi an tel nia sawi chu thu dik lo a ni, a ti.

EC-in Assam electoral roll-a 'D' category-a a dah zing­ah hian mi 1,41,733 an awm thu tarlangin, 'D' category-a awmte hi vote thlak phalsak an nih loh thu a tarlang bawk.

Foreigners tribunal-in mi tupawh India khua leh tui dik a ni lo tia a puan tawh chu an chenna biala Electoral Registration Officer-in a enfiah nghal a, electoral roll-ah an hming a chuang a nih chuan paih nghal an ni, tiin EC thuchhuak chuan a tarlang a, he kalphung hi khauh taka kalpui a nih thu Union Minister Gowda chuan a sawi.

Union Law Minister chuan Assam-a, Barpeta, Dhubri leh Nagaon district-ah 'D' voter an tam ber tih tarlangin, Dhubri-ah 13,026, Nagaon-ah 15,357 leh Barpeta-ah 22,751 an awm, a ti.