Manipur ramah Myanmar sipaite an lut

Manipur, Ukhrul district-a India-Myanmar ramri kanin, Myanmar sipaite chuan Manipur ram an lut a, an luahsak niin report chuan a tarlang.

Myanmar sipaite hian, Khunou khaw bul, Choro hmuna ramri hungna, pillar number 6 leh 96 inkara Manipur ram lam chu April 18 aṭang khan an luahsak tiin report chuan a tarlang a, thingtlang khaw mi 30 chu an ram luah aṭangin an chhuahtir tiin a tarlang bawk.

Report an dawn hnuah Manipur Chief Minister O Ibobi Singh chuan Ninga­ni khan sub-divisional officer (SDPO) kaihhruaina hnuaiah thil nih dan enchiang turin police team a tir nghal.

Chief Minister Ibobi chuan central security forces hotute leh state police hotute meeting a neihpui nghal.

Meeting-ah hian Assam Rifles (South) Inspector General, CRPF Inspector General, SIB additional director, 57 Mountain Division IG, Border Security Force DIG leh DGP bakah Manipur Police ADGP te an tel a, Manipur additional chief secretary O Nabakishore leh principal secretary (home) Suresh Babu te pawh an tel a ni.

Report-in a tarlan danin Myanmar sipaite hian Choro hmuna Manipur ram chu an ramah an chhal a, helai hmun hi dap nghalin Manipur mite buh her khawl leh bungraw dangte an mansak bawk.

Hetihlai hian Kangpat khaw mipuite chuan an ram kilometre thum biala zau chu Myanmar lam hian an luahsak niin an sawi bawk.