Assam-Nagaland ramri mipuite inkarah boruak a sosang

Assam-Nagaland ramri, Mokokchung district-a Yajang (C) khaw mite farm leh leilet chu Assam Police leh Central Reserve Police Force (CRPF) te kaihhruaina hnuai­ah Assam mite'n an tihchhiat­sak avangin ramri mipuite inkar boruak a sosang hle.

Yajang (C) khuaa Village Council Chairman Imtionen chuan kar kalta Zirtawpni khan Assam lam aṭangin mi 100 chu Yajang (C) khaw mite farm leh leiletah an kal thu a sawi a, Assam police leh CRPF te'n an ṭawiawm niin a sawi.

Yajang khaw mipuite'n leilet an va thlen hnuah police te chuan van lamah silai hmetpuakin farm leh leileta thlaite chu an suasam zui nghal a ni, a ti.

Imtionen chuan Assam mite hian areca nut kung 500, balhla kung 300, sertlum kung 100, farm house pahnih leh huan hungna te an tichhia a ti a, hemi kaihhnawihah hian Longchem police station-ah FIR an thehluh thu a sawi bawk.

April 6 khan Mokokchung district (Nagaland) DC leh Jorhat district (Assam) DC te chuan ramri chungchangah joint border coordination meeting an lo nei tawh a, district pahnih thuneitute chuan ram inchuh chungchanga remna leh muanna a awm theih nan thilthleng chanchinte inhrilhtawna meeting neih ṭhin an rel a, district pahnih SP te pawhin police patrolling an neihnaah information inhrilh tawn ṭhin turin thutlukna an siam bawk.

Meeting chuan Disputed Area Belt (DAB) hnaiha police OC te pawh thawk ho turin a lo rel tawh a ni.