Assam chu manpower thawnchhuaktu a ni: Gogoi

Assam Chief Minister Tarun Gogoi chuan Assam chu India rama hnathawktu (manpower)- skilled leh unskilled thawhtu state a ni, a ti.

Skill development chungchanga kar kalta Inrinnia New Delhi-a NITI Aayog meeting-ah Gogoi chuan he thu hi a sawi a, agriculture, animal husbandry, fishery, weaving, sericulture security services, food processing, construction, paramedical, nursing services, oil and natural gas leh tea industry lamah pawh basic skill training tihchangtlun an mamawh thu a sawi.

Assam Chief Minister Gogoi chuan Assam-a unemployment rate sang chho zel chu a ngaihmawh thu sawiin, hetihlai hian helpawlte avanga harsatna thleng chu a thlak hniam thu a sawi bawk a, kum 10 kalta chhungin state sorkar chuan theihtawp chhuahin economy tundin nan a bei a ni, a ti.

"Mithiamte chuan hna­thawh tur awm lo chu khawtlanga buaina leh tharum thawhna hrang hrang thlen chhan niin an sawi a, hei hi thudik a ni," tiin Gogoi chuan a sawi.

Skill development lama private sector te mawhphurhna tarlangin Gogoi chuan skilled labour-a private company te mamawh phuhruk nan private industry te'n skill development lamah sorkar an thawhpui a ṭul thu a sawi a, vocational training centre leh industrial training institute (ITI) te private company te thawhpuina kan mamawh a ni, a ti.

Gogoi chuan Assam-a vocational education kalphung sawiin Germany, China leh Singapore-a vocational education system hlawhtling taka an lo kalpui tawhte kalphung chu zirchian an tum thu leh Assam-a an kalpui theih dan turte zirchian an tum thu a sawi.

Assam Chief Minister chuan India rama state tinte official school curriculum-ah vocational education course a tlem thu sawiin, lehkhazir bansan tawhte tan duhthlan tur leh kawng inhawng a awm ṭhin loh thu a sawi.

"Middle school level-a school curriculum pang­ngaiah vocational education course telh tir chungchang hi mithiam te'n ngun taka an ngaihtuah a ngai a ni," a ti.

Chief Minister Gogoi chuan Skill development atan sorkarin fund a ren tur a ni lo tiin, hei hi India ram tan a nih avangin kan theihna leh remchang kan neih zawng zawng sen ral kan hreh tur a ni lo, a ti.

"Special category state te tan Central fund chu 90:10 kalphungin min pe tur a ni a, corporate social responsibility (CSR) hnuaia fund hman tur sorkar laipuiin a rel chu skill development-in a ṭhat phah dawn a ni. Financial institution te'n skill development atana sum an thehchhuah danah kawng awlsam leh senso tlem zawk an ngaihtuah a ṭul bawk a ni. Skill development atana budget-a ministry leh department tinte sum ruahman zat chu bitliah kan tum bawk a ni," tiin Assam Chief Minister chuan a sawi.

Hetihlai hian Gogoi chuan sorkar laipuiin Assam tuilian chhawmdawlna atan cheng vaibelchhe 400 a ruahman chu tun thlenga an la hmuh loh thu tun hnai khan a sawi.

"Nikuma Assam-a tuilian­in thil a tihchhiatte zirchiang tura lo kal, Central team chuan chhawmdawlna atan cheng vaibelchhe 400 a rawt a, mahse cheng khat mah kan la dawng lo a ni," a ti.

Gogoi chuan chhawmdawlna an dawn loh avangin fur lo thleng turah harsatna a thlen nawn a hlauhthawn thu a sawi bawk.

"Chhawmdawlna sum kan phut hi cheng eng zat pawh ni se, a beitham hle a, mahse hei pawh hi kan la hmu lo a ni. Eng tin nge tui­lian danna leh khuahkhirhna kan siam theih ang? Jammu and Kashmir chuan nikum khan tuilian a tuar a sorkar laipuiin chhawmdawlna a pe nghal a ni," a ti.