Tripura-in Air India tlawhtheihna service tir phut

Private airlines te'n thlawh­­theihna chuan man sang tak taka an lak ṭhin tihtawp nan Tripura sorkar chuan Agartala-Kolkata leh Agartala-Guwahati inkarah Air India tlawhtheihna pali service tir an phut.

State transport minister Manik Dey chuan Agartala-Kolkata inkara thlawhtheihna dang thlawhtir tura nasa taka Civil Aviation ministry an ngen hnuah Air India chuan Agar­tala-Kolkata inkarah thlawh­theihna pakhat chauh a thlawh tir thu a sawi.

Sorkar enkawl thlawh­theihna service a tlem avang­in Indigo leh SpiceJet chuan Agartala lama an thlawhtheihna chuan man a leta an tihpun thu transport minister Dey chuan a sawi a, fur lo thleng turah Tripura chu state dangte an inzawmna a chat leh dawn a ni, a ti.

Agartala leh Guwahati inkara lirthei kawngpui chu Assam, Barak Valley huam chhunga kawng chhia avangin kar hnih chuang a tlang tawh loh thu Dey chuan a sawi bawk a, Assam, Karimganj district-ah Agartala pan tur, lirthei bungraw phur sang chuang a tangkhang tawh thu a sawi.

Rel kawng chu siam a nih avangin khar a ni tih Dey chuan a sawi a, hei vang hian state mipuite chuan zinchhuah nan thlawhtheihna bak innghahna an neih loh thu a sawi bawk.

"Nikum December khan airlines te'n thlawhtheihna chuan man an tihsan vak avangin Aviation Ministry a inrawlh phah a, tunah hian airlines te chuan Agartala kawnga thlawhtheihna thlawk chu a chuan man an tisang leh vek tawh a ni," a ti.

Passenger te chuan Agartala-Guwahati thlawhtheihna chuan manah cheng 2,500-3,000 an chawi a ngai a, Agartala-Kolkata inkarah cheng 5,000-7,000 an sen a ngaih bakah Agartala-Delhi inkarah cheng 7000-10,000 an sen a ngai tawh a ni.

State transport secretary Samarjit Bhowmik chuan tun hnai khan Union civil aviation secretary V Somasundaran a hmuh thu sawiin, Agartala-ah Air India thlawhtheihna pali thlawh belh tir tura an ngen thu a sawi.