NE tan satellite channel hran siam dawn

Association of Doordarshan Programme Production Personnel (ADP3)-in Guwahati-a ni hnih awh, national convention vawi li-na a hmanah kar kalta Inrinni khan Assam-a Lok Sabha MP Bijoya Chakravarty chuan hmarchhak tan satellite television channel hran a siam a nih tur thu a sawi.

MP Chakravarty-i chuan Door­darshan-a thawkte hna­thawh dan harsat zia a hriatpui thu sawiin, programme ṭha tak duang chhuak turin Doordarshan programmer te chuan ngaihtuahna fing tak an neih a pawimawh a ni, a ti.

Doordarshan Programme staff kum 30 chuang promotion hmu loa thawk tawhte chungchang sawiin Chakravarty chuan an dinhmun hrehawmna a hriat­thiampui thu leh Union minis­ter hnenah an chung­chang thlen a tum thu a sawi bawk.

Doordarshan staff te chu mipui rawng an bawlnaah lawm­thu a hrilh bawk.

Director General of Doordarshan C Lalrosanga chuan hmar­chhak bial tana satellite channel hran siam tur chungchang sawiin DD channel thlirte tan programme ṭha leh rintlak duang tura theih­tawp an chhuah thu a sawi. Tun hnaiah television channel hrang hrang lo chhuak mah se DD chuan a content ṭhat avangin a identity a la humhim thei a ni, a ni.