NFR-in khualzin ticket nei lo aṭangin thla 6 chhungin Rs vbc 34.06 hmu chhuak

North-east Frontier Railway (NFR) chuan rela chuangte an endikna ṭhina ticket nei loa chuangte pawisa an chawitir aṭangin, thla ruk chhungin Rs vbc 34.06 an hmu chhuak.

Relah hian khualzin, dik taka ticket la ṭhinte nuam taka an zin kual theihna turin ticket nei lo leh dan loa chuang te ngun taka endik an ni ṭhin. He an endiknaah hian April 2024 leh September 22, 2024 chhung khan mi 3,96,101 rel ticket neilo manchhuah an ni a, heng mite sum an chawitir tling khawm hi Rs vbc 34.06 a tling a ni. Nikum lam pawh khan ticket nei loa chuang mi 3,94,076 hnen aṭangin Rs vbc 33.78 an lo hmu chhuak tawh bawk.

Kumin chhunga an endiknaah hian kumhmasa lam aia dan lo thil ti man chhuah hi 0.51% in an tam a, an sum hmuh pawh 0.82% in a pung a ni.

Kumin April aṭanga August thla chhung khan sawi lawk loin rela chuangte ticket neih leh neih loh endik runpui, surprise ticket checking drive ṭum ṭhum neih a ni tawh. Hengah hian Railway Act, 1989 bawhchhia mi 328 hmuh chhuah niin sum chawitir an ni. Ṭum thum ticket endik hna kalpuina aṭanga an sum hmuh chhuah hi Rs vbc 10.58 a tling. Ticket nei loa rela chuangte hi ticket man pek tir an nih bakah, dan loa an thiltih avangin sum an chawibelh bawk ṭhin. Sum chawi tura tih hi an pe thei lo a nih chuan, Railways Act, 1989. hnuaiah an chungthu ngaihtuah sak an ni ṭhin.

NF Railways chuan mipuite chu rela an zin dawn chuan dan ang taka ticket la vek turin a chah a, hei bakah harsatna an tawh lohna turin identity card te pawh keng zel turin a ngen. Unreserved Ticketing System(UTS) mobile application aṭangin ticket hi lei theih vek a ni tawh a ni.