Tripura: Bangladesh-a minority te himna ngaihtuah turin phut

Tripura-ah mi eng emaw zatin sorkar laipui chu Bangladesh-a hnam leh sakhaw tlem zawkte sahimna ngaihtuah sak tura phutin, an thil phut lantirin kawng an zawh.

State khawpui, Agartala-a kawngzawhah hian mi 1,000 vel an tel a, an zingahhian thiamna sang tak tak neite bakah journalist, zirtirtu, ukil, doctor leh tualchhung mite pawh an tel a ni. He kawngzawh hi Forum For Protection of Minorities in Bangladesh huaihawt a ni a, Bangladesh-a hnam leh sakhaw tlem zawkten beihna leh tihduhdahna an tawrh ṭhin avanga lungawi lohna lantira buatsaih a ni.

Forum president Subal Kumar Dey chuan Bangladesh prime minister hlui, Sheikh Hasina kaihhruai sorkar a tlukchhiat Bangladesh-ah rorelna a mumal lo a, dan leh thupek kenkawh mumal a nih tak loh avangin sakhaw tlem zawk, Hindu ten beihna an tawk nasa a ni, a ti. "Bangladesh tualchhung buaina thleng mek chu kan ngaihven reng a ni. Quota movement chungchanga buaina chhuak vang hian sakhaw tlem zawkten beih an tawk chho a, temple leh sumdawnna hmunte suasam niin, Hindu te chu sakhaw danga inleh luihtir an ni bawk,"tiin heng hi enliam mai chi a ni lo a, hetianga rawng taka chetna a thleng chhung chuan lungawi lohna lantir chhunzawm zel an tum tih a sawi.

Organisation chuan prime minister Narendra Modi hnena thawn tur memorandum pahnih an buatsaih a, Bangladesh buainaa sakhaw tlem zawkte tawrhna thleng mekah India sorkar chu inrawlh turin an phut a ni.