Assam CM-in tuilian tuarte tlawh

Assam Chief Minister Sarbananda Sonowal chuan Ningani khan tuilianin a tihbuai hmun ṭhenkhat, Majuli, Nagaon, Morigaon, Jorhat, Lakhim-pur leh Dhemaji district te a fang kual.

Chief Minister hian helicopter hmangin tui-lenna hmun hrang hrangte hi a fang kual a, Water Resources Minister Keshab Mahanta leh Rural Development Minister Naba Kumar Doley ten an ṭawiawm. Sonowal chuan minister-te chu tuilian tuar mekte an harsatna tawhte a hmunah kala enfiah tur leh an mamawhte ngaihtuahpui turin a hrilh. Tuilian hian district 22-a khaw 3,374 zet a chim tawh a ni.

Assam State Disaster Management Authority (ASDMA) te chuan tuilian hi a thli thlai reng a, Neamatighat, Tezpur, Guwahati, Goalpara leh Dhubri-ah te chuan Bramaputra lui chuan hlauhawm chhinchiahna a pel chho ve leh tawh niin an tarlang. Hetihlai hian Burhidihing lui pawhin hmun ṭhenkhatah mihring chenna hmun a chim chho leh ṭan mek a, Subansiri lui chim chin a san chhoh mek bawk avangin Badatighat, Desang, Nanglamuraghat leh Numaligarh khuate dinhmun chu a ṭha lo tawh hle. Bharali lui lian chuan hmun eng emaw zatah inkalpawhna kawngpui a chim tawh a, lei tenau eng emaw zat a la tawh bawk. ASDMA te chuan an harsatna tawh mek chu an rin phak bak a thlen chhoh thu sawiin, a bikin Lakhimpur, Golaghat, Bongaigaon, Jorhat, Dhemaji, Barpeta, Goalpara, Dhubri, Darrang, Morigaon leh Sonitpur te chu dinhmun hlauhawm takah an ding mek niin an tarlang.

Himna zawnga in leh lo chhuahsan an pung zel a, chenna neilo mi 2,29,544 zet an awm tawh. Relief camp 517 sak tawh a ni a, sak belh bek zel a ni bawk. Chhanchhuah hna thawktu an indaih loh avangin volunteery-a thawk mi eng emaw zat an awm a, tui in tur leh ei tur thianghlim lo avanga thi an awm loh nan thuneitute chuan theihtawp chhuahin hma an la ve reng bawk.

Tuilian vang hian state chhunga park hrang hranga ramsa te tawrhna pawh a zual zel a, Ningani khan Kaziranga National Park-a samak note thi mai tur paruk te chu chhanchhuah an nih thu Forest official chuan a tarlang. State Forest Department team, mobile veterinary service team leh sorkar laipui aṭanga kal Centre for Wildlife Rehabilitation and Conservation (CWRC) te chu nungchate himna ngaihtuahin an hmanhlel hle a ni.

Wildlife Trust of India deputy director Rathin Barman chuan samak note an chanchhuah te hi hmun hran ami an nih thu sawiin, an puiten an thihsan niin a sawi a, a hnuah an ruang hi tui chuan a len chhuak niin a sawi bawk. Park aṭanga km 5-a hla veterinary centre-ah enkawl an ni a, an dam chhuah theih beisei a ni. Ramsa thi mai turte chhanchuah hna chu ngawrh taka an tawh reng thu Barman chuan sawiin, ramsa tam tak te dinhmun chu a ṭha lo hle a ni, a ti. An chenna ram zau zawk tuilian hian a chim tawh avangin himna an zawnna lamah ramsa eng emaw zat an thi tawh a ni. Samak puitling tawh ṭhahnem tak chuan Karbi Anglong hills chhuahsan tumin an bei mek a, fimkhur a ngai hle niin an a tarlang. Kaziranga National Park hi India rama UNESCO world heritage site tlemte zinga mi a nih avangin sorkar chuan a ngaihven hle.