Chura District-ah JE natna vangin Sikul khar

Manipur sorkar chuan Japanese Encephalitis (JE) len mekna hmun Churachandpur district-a zirna-in zawng zawngte chu ni sarih chhung khar a phal sak.

Encephalitis natna avang hian Nilaini khan naupang pakhat chu Regional Institute of Medical Sciences (RIMS) Imphal-ah a boral ve leh a ni. Medical official-te chuan tun hnaiah meeting vawi thum an neih tawh thu sawiin, hma la turin Rapid Action Committee din a ni a, member pariat awmin Chief Medical Officer chuan a ho a ni. He natna vei thar hi mi pahnih hmuhchhuah an ni leh tawh a, pakhat zawk hi enkawl hman lohin a boral zui a ni.

Health official data-a tarlan a nih dan chuan, district hospital-ah Fever Clinic din a ni a, case 1,219 awm tawhin, mi 7,500 zet JE vaccine pek an ni tawh. Japanese Encephalitis a darh zel avanga leh nunna chan an awm leh tak avang hian July 28 aṭang khan Churachandpur district-a zirna-in te chu khar vek a ni.

Churachandpur DC Lunminthang chuan, "District thuneitute leh Churachandpur Chief Medical Officer-te hoin hma lak mek a ni a, vaccine sem chhuah mek zel a ni" a ti. Health Department chuan vaccination camp buatsaihin, kawng hrang hrangin hma an la mek a ni. Japanese Encephalitis hi thosi seh aṭang kai theih niin, Manipur-ah hian tun hma pawhin a lo darh tawh ṭhin a ni.